Сахам ньургуһуна

Айылҕам уһуктуута
Тоҥ буору тобулаҥҥын,
Тулаҕын киэргэтэҥҥин
Тахсан кэллиҥ ньургуһун-
Таптал кэрэ кэрэһитэ,
Тулуурбут туйгун туоһута,
Кэтэспит кэммит илдьитэ,
Олох салҕанар бэлиэтэ.

Күн сирин көрбүккүттэн
Сэмээр үөрэр курдуккун,
Сылаас күҥҥэ угуттанан
Сылаанньыйа сыламныыгын,
Төбөҥ сэрэнэн хоҥкуйан
Тыал сэгэрдиин сипсиһэҕин,
Кэрэ бэйэҥ килбигийэн
Кэмчиэрийэ эн тупсаҕын.

Ньургуһуммут эн эбиккин
Айылҕа мааны айыыта,
Сахалардыы сэмэйгинэн
Нарын-килбик бэйэлээххин,
Урааҥхайдыы ураҥҥынан
Умсугута абылыыгын,
Сүрэҕи сүүйэр күүскүнэн
Ньургун сибэкки буолаҕын.

Ньургуһун баарыҥ тухары
Таптаһыахтара эдэрдэр,
Чаҕаарыахтара оҕолор,
Үөрсүөхтэрэ үөлээннээхтэр,
Айхаллыахтара аҕамнар,
Баар буолуоҕа Сахам сирэ,
Баар буолуо саха омуга,
Баар буолуоҕа инникитэ!

Акулина Колмогорова.
«Куорсун» айар түмсүү.
Дьохсоҕон.Таатта
18.05.2022.

Ньургуһун.

Саас буолан
ылааран,
Хаар ууллан
бүтүөхчэ,
Харалдьык аайытын
бөлүөхсэн,
Тоҥ буору
тобулан
Саас кэлбит
илдьитэ ,
Ньургуһун сибэкки
чэчириир.

Сүрэҕи манньыта
туймаарда,
Сэлэлии тураллар
сиэттиһэн,
Сир кэрэ симэҕэ
киэргэлэ,
Үөрүүнү бэлэхтии
үүммүттэр.

ДЬӨГҮӨР. ТААТТА.
«Куорсун» Дьохсоҕон.

Араҥас төбө нуоҕайар

Тэлгэһэбэр тэһэ көрөн
Ньургуһуннар үүммүттэр,
Оргууй хамсаан сиккиэр тыалга
Эҕэрдэлии көрүстүлэр.
Күнү кытта тэҥҥэ сырдыы
Араҥас төбө нуоҕайар,
Эрэл Таптал кыымнарын
Үөрбүт харахха бэлэхтиир.

Дьохсоҕон Кыыһа Таатта

Ньургуһуннар

Таптал тыынын иҥэриммит
Сааскы сарыал кыргыттара,
Кырдал ньуурун киэргэтэннэр
Нууралдьыһа нуоҕайбыттар.

Ньургуһуннар, ньургуһуннар,
Нарын-намчы сибэккилэр.

Күннүү сырдык утахчааннар
Күүстээх санаа кыымчааннар,
Сандаарыһар сардаҥалар
Ымыы куттаах чэчиктэр.

Ньургуһуннар, ньургуһуннар,
Нарын-намчы сибэккилэр.

Харалдьыкка оһуор анньа
Бөлөх бөлөх чөмчөспүттэр,
Быллаар быыһын батыһаннар
Хаххалана хатаммыттар.

Ньургуһуннар, ньургуһуннар,
Нарын-намчы сибэккилэр.

Таптал тыынын иҥэриммит
Сааскы сарыал кыргыттара,
Кырдал ньуурун киэргэтэннэр
Нууралдьыһа нуоҕайбыттар.

Арылы

«Куорсун» айар түмсүү.
Дьохсоҕон. Таатта.

Ньургуһуннар.

Халыҥ хаары халбарытан
Тоҥ буору тобулан
Үрдүк сиргэ, халдьаайыга
Үгүс саһархай ньургуһуннар
Сахам сирин сааскытын
Кэрэ илдьиттэрэ буоланнар
Сылаас күҥҥэ тардыһан
Үүммүттэрэ элбэҕиэн.

Хас саас аайытын
Эдэр сааһы эргитэ
Халдьаайыга, сыһыыга
Саһархай ньургуһуннар
Уоллаах кыыһы саната
Төбөлөрүн холбоон
Сипсиһэрдии нуоҕайан
Сэргэстэспиттэрэ кэрэтиэн.

Таатта Татыйыга.
«Куорсун» айар түмсүү
Дьохсоҕон.Таатта.

Араҥас төбө нуоҕайар

Тэлгэһэбэр тэһэ көрөн
Ньургуһуннар үүммүттэр,
Оргууй хамсаан сиккиэр тыалга
Эҕэрдэлии көрүстүлэр.
Күнү кытта тэҥҥэ сырдыы
Араҥас төбө нуоҕайар,
Эрэл Таптал кыымнарын
Үөрбүт харахха бэлэхтиир.

Дьохсоҕон Кыыһа.
«Куорсун» айар түмсүү.
Дьохсоҕон. Таатта.