1 Star2 Stars3 Stars4 Stars5 Stars (2 оценок, среднее: 5,00 out of 5)
Загрузка...
150 просмотров

«Был я сыном народа…»

11.11.2022с.Улуу Ойуунускай төрөөбүтэ 129сыла.

Абаҕам тиһэх күннэригэр санаам.

Ойуунускай абаҕам
Олоҕун тиһэх күннэрэ
Олус да дууһабар ыар…

Сүдү киһибитин
Суолталаабакка
Суорума суоллаабыттар!

Үтүргэннээх олоҕу
Үтүрүйсэн-хабырыйсан
Үөрэн-көтөн,

Көҥүл олох кэлбитин
Күөнүнэн көрсөн
Күөмчүлэһэ сырыттаҕына,

«Тороскуус» диэннэр
Түргэнник тутаннар
Түрмэҕэ түүнүгүртэхтэрэ!

Сорун-муҥун ытатан
Соһо сылдьан
Сордоотохторо!

«Билин» дии-дии
Баһымахтык
Баалкылаатахтара!

«Саҥар»дии-дии
Сылайыахтарыгар диэри
Саайталаатахтара!

Эппэтэҕин этиттэрээри
Элэйиэхтэригэр диэри
Эттээтэхтэрэ!

«Таҥнарыахсыккын»диэн
Таҥнары ыйаан
Таһыйдахтара!

Толкуйдуурун тухары
Тобулута охсоллорун
Тулуйаахтаатаҕа!

Өйдүүрүн тухары
Өйүнэн-санаатынан
Өрөлөһө сытаахтаатаҕа!

Саҥарбат буолуор диэри
Саргылаах санаатын
Самнарбатахтар!!!

Өлүөр диэри
Өркөн өйүн
Өһүлбэтэхтэр!!!

Кэрэ мөссүөнүн
Кэйгэллээбиттэр
Кэп туоммуттара буолуо дуо?!

Аат-суол былдьаспыттар
Амтыын кырыыска
Аттаммыттара буолуо дуо?!

Киһиттэн сүөргүтүк
Кэбилээбиттэр
Кэмсиммиттэрэ буолуо дуо?!

Дьардьама буолбутун
Дьааманы булларан
Дьаһайбыттара буолуо дуо?!

Албаннаах аата
Ааттаныаҕын биллэр да
Абаккара аттаннаҕа…

Улуу киһибит
Уруйданарыгар тиийбэккэ
Уһун уутугар утуйдаҕа…

В.Харайданова — эбэ Валя.
«Куорсун» айар түмсүү.
Дьохсоҕон.Таатта.

 

Аны…

*П.А.Ойуунускай сырдык кэриэһигэр ананар*
Аны,эн үтүө ааккар
Аны, эн сырдык кэриэскэр
Алдьархайдаах ааҥнаабат
Алдьатыылаах алтыспат
Аргыардаах айбардаабат
Атааннаах аргыстаспат
Дьиэктээх дьайбат
Иэдээннээх иэнигийбэт
Идэмэрдээх иҥнибэт
Иһэхтээх иилистибэт
Кирдээх кыттыспат
Куорҕаллаах кыбыллыбат
Кырыыстаах күөрэйбэт
Көлбөхтөөх көймөстүбэт
Охторуулаах орооспот
Омнуолаах онолуйбат
Оһүөннээх өргөстөммөт
Өһөрүүлээх өндөйбөт
Уодаһыннаах уордайбат
Уорааннаах олохсуйбат
Үөннээх үөгүлээбэт
Суостаах суоһаабат
Салаҥнаах сыстыбат
Сиэхсит суолламмат
Самнарыылаах саантаабат
Таҥнарыылаах тыҥаабат
Хомноох хоммот
Эндирдээх эккирэппэт
Ынырыктаах ыксаласпат.
Аны, эн үрдүк ааккын
Аны, эн сырдык кэриэскин
Атарахсыт аймаабат
Албыннаах айгыраппат
Балыырдаах баһааҕырдыбат
Баламаттаах баттаабат
Буортулаах буомурдубат
Иирээннээх иҥнэрбэт
Күтүрүүлээх күөнтээбэт
Кырыылаах кыһарыйбат
Кыдьыктаах кыбдьыгыраабат
Куомуннаах кириэтээбэт
Кырыктаах кыайбат
Моһуоктаах манаабат
Сойуолаах солбонуппат
Саадахтаах суулларбат
Угаайылаах уйгуурдубат
Уорбалаах уодьуганнаабат
Үктэтиилээх үрэйбэт
Тыҥырахтаах тыыппат
Тигээйилээх тирээбэт
Түҥнэриилээх таарыйбат
Хаһыннаах хаарыйбат
Хатыылаах хаайбат.
Аны…
Аныгы сүүрбэ биирис үйэҕэ
Сардаҥалаах, саһарҕалаах
Көҥүл кэм сайдыылаах
Саҥа саха норуота
Илбис тыл туйгуна
Былатыан убайбыт
Кырдьыбат үйэлээх
Ырыаҕын ыллыыбыт,
Дуорааннаах тойуккун
Доргуччу туойабыт.
Эн сырдык Айыылыы
Албаннаах ааккынан
Киэн туттуу төлөнө
Хас биирдии сахаҕа.
Аны…
Эн боруонса мөссүөҥҥэр
Хоҥкуйан турабыт
Сибэкки уурабыт,
Махталлаах сүрэхтэн
Сүгүрүйэн ааһабыт.
Аны да кэлэр кэм
Инникигэ сыҕарыйар
Кэрэхсэллээх кирбиитигэр
Сайдам саха тылынан
Сайа тыынар норуоппут
Үүнэрин үксүүрүн
Сайдарын тухары
Үс саха төрүөҕэр
Үөрүүлээх күнүгэр
Эн ырыаҥ ылланыа,
Эн аатын ааттаныа турдаҕа.

Мария Ефимова.
«Куорсун» айар түмсүү.
Дьохсоҕон.Таатта.

 

Былатыан алааһа

Мин бүгүн сырыттым
Былатыан алааһыгар,
Ыалдьыттаан аастым
Балаҕан дьиэтигэр.

Көмүлүөк оттулла
Иэйиинэн көрүстэ,
Итиитин бэрсэ
Илгийэ тыынна.

Бу манна аһыллан
Хоһооммун хонноҕун
Холоонноох ааҕыыта
Барыны долгутта.

Бэл уоппут бу үөрэн
Таһыргыы тыаһаан,
Кыымынан ыһыахтыы
Күндээрэ кыыста.

Убайбыт алгыһа
Сатыылаан түстэ,
Алгыстаах аартыкка
Аҕалыы атаарда.
… Арылы

 

🚩📝
Кыыһар сардаҥа уотугар,
Көмүлүөк оһоҕун суоһугар,
Көҥүлүн көччөхтүү көтүтэ,
Көмөлтө суругун саҥатта.
Күүгүнүүр күннээх халлааҥҥа
Күүһүрдэр күдэн санаатын,
Кэскиллээх толкуйун сааһылаан,
Кэхтибэт кэнчээри дьонугар,
Кэс тылын кэрэтин хаалларар
Кубулҕат олоҕу ньиргиэрдээн
Былатыан толкуйун ырытан
Күн көҥүлүн айхалын күөрэттэ.

Дьохсоҕон Кыыһа Таатта
11.11.2022с

Добавить комментарий

Ваш адрес email не будет опубликован. Обязательные поля помечены *