🎄🌲🎄🌲🎄🌲🎄🌲🎄🌲🎄🌲
Ааспыт кэмнэргэ советскай художник Владимир Зарубин уруһуйдаабыт Саҥа дьыллааҕы открыткаларын туппуттарын санатаары, нэһилиэкпит бэтэрээннэригэр ол кэм открыткаларынан саҥа дьыллааҕы Эҕэрдэлэр почтанан сюрприз буолан айаннаатылар.
🎄»Күөх уот» диэн саҥа дьыллааҕы бырааһынньык киэһэтигэр ыҥырыы суруктаахтар ити «ностальжи» открыткалар.
🎄Художник-мультипликатор В.Зарубин бастакы открытката 1962с.тахсыбыта. Кини открыткаларын тиражтара 1588270000 экз.буолбуттар.Кини открыткаларын ойууларынан маҕаһыыннар витриналарын киэргэтэллэрэ, истиэнэ хаһыаттарыгар туһаналлара. Ити открыткаларга ойууламмыт Тымныы оҕонньор, оҕолор,тыа кыыллара уонна снеговиктар бары наһаа үтүө санаалаахтар уонна ис киирбэхтэр, бырааһынньык үөрүүтүн тиэрдэр өҥнөөх уруһуйдар.
🎄Соц.ситимҥэ баар ахтыыны ааҕан ааспыт кэмнэри өйдөөн-санаан ылыҥ:
«Былыргыта буоллар Саҥа дьылынан открытка суруйуутун процеһа киэҥ далааһыннаахтын бара турар кэмэ. Хас аймаҕын, ыалларыҥ, онно манна сылдьар оҕолорун барыта ааҕыллан почтовай отделенияҕа биир, икки киһи баран открытка атыылаһыыта буолара. Открытка оҥоһуутунан, суругунан уонна сыанатынан да араастаах буолан суортаан араас, араас өттүттэн ылаллара. Мунаахсыйар түгэҥҥэр Почта Рита оннугун булларан , сүрүннээн биэрэрэ. Дьэ ол кэнниттэн субботнигынан суруйуу саҕаланара. Манна да син ыытар дьонуттан көрөн араарыы баара чахчыта. Арыый чугас диэбит дьоҥҥор кэм киһилии буочардаах киһи суруйара уонна кэппиэйкэнэн да буоллар сыаналаах өттө ананара. Сороҕор ааспыт сырыыга ыыппыт эҕэрдэҕэр эппиэт кэлбитэ, кэлбэтэҕэ учуоттанара. Эҕэрдэ Сурук ис хоһооно маҥнай тус туһунан толкуйданыах буолан иһэн син биир соҕус халыыпка киирэрэ. Ол доруобуйаттан, дьолтон, ситиһиилээх үлэттэн, үөрэхтэн ураты тугу да этиэххиний. Ол да буоллар валовай открыткалартан ураты туспа ылыныллыбыт, анал аадырыстаммыт , иэйиилээх соҕус ис хоһоонноохтор да бааллара.
Дьэ онтон почтальон үлэтэ саҕаланара — көннөрү күннэртэн икки, үс төгүл үллүбүт хара суумкатын сүгэн кэлэн дьааһыкка угара, сороҕор иһэрин түннүгүнэн секи гыннаххына илииттэн ылыы буолара. Саҥа кэлбит открыткалар барыта ааҕыллан, өйдөнүллэн дьон көрөр сиригэр трюмо сиэркилэ сииктэригэр анньыллан бырааһынньык биир киэргэлэ буолара. Анал открытка күүтээччилэр дьон билиитигэр таһаарымаары кэлиини почтаттан быһа ылан сүрэх ымыыта оҥостоллоро.
Саҥа Дьылы урут ис сүрэхтэн суруллубут открыткалар саҕалыыллара. Биир эмэ ордубут буоллаҕына булан көстөр сиргэ ууран, уруккугутун санааҥ».