1 Star2 Stars3 Stars4 Stars5 Stars (8 оценок, среднее: 5,00 out of 5)
Загрузка...
410 просмотров

«Эбээ,эһээ үөрэҕинэн»

Олунньу 10 күнүгэр 7 кылаас оҕолоругар «Эбээ, эһээ үөрэҕэ» бырайыакпыт чэрчитинэн «Остуоруйа киэһэтэ» ыыттылынна.
📌Кэтэһиилээх дьоро киэһэ саҕаланыытыгар Ветеран учууталбыт Светлана Климентьевна Архипова аал уоту аһатта, алгыс тыллары анаата.
📌 Эбээлэр Светлана Климентьевна, Любовь Константиновна, оҕолорго эһээлэрэ Владимир Петрович, 7 кылаас салайааччыта Мария Владимировна үөрэппит оҕолоро Виктор Иннокентьевич Другин, Гаврил Сергеевич Кычкин наһаа үчүгэйдик былыргы үһүйээн уонна остуоруйа кэпсээтилэр, өбүгэ итэҕэлин, сиэрин-туомун, оонньуутун сырдаттылар.
📌 Оҕолор төрөөбүт тылларынан остуоруйаларын тэҥэ омук суруйааччыларын киэҥник биллэр остуоруйаларын кинигэлэрин быыстапкатын олус сэҥээрдилэр, аахпыт кинигэлэрин көрөннөр доҕотторун көрсүбүт курдук үөрдүлэр.
📌 Бу киэһэ өссө оҕолор талкыга тириини хайдах имитэри, сүөһү төбөтүн, туйаҕы кыйахалаан дыраһааҥкы буһарарга бэлэмнииллэрин, кутуругу сүлэн миин буһарары билистилэр.
📌 Ол быыһыгар Любовь Константиновна эбээтэ тикпит күндү үлэтэ — куобах суорҕана сымнаҕаһын, сылааһын сөхтүлэр.Былыргы суорҕаҥҥа сууланан астынан, кып — кыра куобахтан иистэнньэҥ маннык улахан суорҕаны тикпитин сөхтүлэр.
📌 Көмүлүөк уотун суоһугар өбүгэлэрбит сыа арыытыгар мааны астарын алаадьыны астыылларын көрдөрөн Любовь Константиновна алаадьыны сырдьыгыначчы буһарбытын оҕолорбут сылаастыы минньигэстик амсайдылар-астыннылар амтанын.
📌 Оҕолорго өбүгэлэр сарсыардааҥы аһылыктарыгар ордук таптаан сиир, туһалаах биир күндү астарын күөрчэх ытыйан, үтэһэлээх эт, ыһаарыламмыт собо уо.да.а.сахалыы өбүгэлэр астарын тото-хана амсайдылар.
📌 Билигин умнуллубут, ким да сатаан оҥорбот сахалыы бэс үөрэтин утаҕын оҥорору Любовь Константиновна билэр буолан, өбүгэлэрбит мындыр өйдөрүнэн саас эрдэ бэс ис сутукатын хастаан ылан, арыы уутугар кыратык бурдуктаан оргутан оҥорор дьикти, доруобуйаҕа олус туһалаах утахтарын амсайдыбыт.
📌 Виктор Другин таһаарыытынан «Кыһыҥҥы оһуохайы» оһуохайдаан дьоро киэһэбит үөрүүлээхтик түмүктэннэ.
🔸Онон оҕолорго аналлаах олох атын, туспа сахалыы эйгэ буолан ааста: көмүлүөк оһох оттулунна, хомус тыаһынан арчыланыы, былыргылыы ынах иһин сыатыгар алаадьы астанна, оҕолор остуоруйа иһиттилэр, кинигэ быыстапкатын көрдүлэр уонна өбүгэ сиэрин-туомун төһө билэллэригэр тургутууну аастылар. Алаадьы буспут арыытын чааныгар бары ыраастаннылар.
🔸Сүбэ-саргы түстүүр учууталга Светлана Климентьевнаҕа, саха тылын учууталыгар Мария Владимировнаҕа, биир субэнэн бырайыагы салайар Любовь Константиновнаҕа, Владимир Петровичка, оскуола выпускниктара Виктор Иннокентьевичка, Гаврил Сергеевичка оҕолор ааттарыттан махтал!
🔸Бу саҥа бырайыагы саҕалааччы, төрүттээччи Любовь Константиновна Власова баҕа санаалара олоххо киирэ турдунар!
🔸Тэрээһиннэрбит кэҥии, сайда, оҕолору төрүт үгэскэ уһуйдунар. Оҕолор сиэри — туому, өбүгэ үөрүйэхтэрин олоххо туһана үөрэннинэр.

🔸Уолаттар байанайдаах, кыргыттар толору сандалылаах чэгиэн -чэбдик доруобуйалаах, омук быһыытынан уратыбытын өйдүүр дьон буола улаатыахтара диэн эрэнэбит. Бу үлэлии сылдьар бырайыакпыт умнуллубат үөрэх буолуо,үтүөкэн өйдөбүлү хаалларыаҕа.

Мантан аллараа дьикти киэһэ түгэннэрин хаартыскаларга көрүҥ,оһуохайы истиҥ.

 

Добавить комментарий

Ваш адрес email не будет опубликован. Обязательные поля помечены *