1 Star2 Stars3 Stars4 Stars5 Stars (3 оценок, среднее: 5,00 out of 5)
Загрузка...
353 просмотров

Айар күрэс түмүгэ.

«*Сахам тыла — төрүт тылым!*» диэн куйаар ситиминэн

Алампа аатынан Норуот айымньытын дьиэтэ,

М.А.Петров аатынан библиотека,

«Куорсун» айар түмсүү тэрийэн ыыппыт аһаҕас айар күрэһин түмүгэ ✍️

📌 *Оҕолорго*:
🔸Павлова Жанна — Кыайыылаах үрдүк аатын ылла. 9″б» кылаас, П.Х.Староватов аатынан Элгээйи орто оскуолата.
🔸Васильев Алгыс — 2 миэстэ. Уус Алдан улууһун В.М.Прокопьев аатынан Тумул орто оскуолатын 6 кылааһын үөрэнээччитэ. Салайааччы: А.Р.Халдеева аатынан модельнай библиотека библиотекара С.А.Прудецкая.
🔸Андреева Анастасия -3 миэстэ.Сунтаар улууһа, Сунтаар сэл. СПТЛИ. 10кылаас үөрэнээччитэ. Салайааччы:Гуляева А.С.

📌 *Улахан дьон* (50 сааска дылы):
🔸Попова Вероника Васильевна — Туналы Солко — Кыайыылаах үрдүк аатын ылла.Таатта улууһа, Кыйы бөһ.»Хардыы» айар түмсүү.
🔸Макаров Сергей Исаевич — 2 миэстэ. Хаҥалас улууһа, Булгунньахтаах сэл.
🔸Протопопов Дмитрий Юрьевич -3 миэстэ. Таатта улууһа, Кыйы сэл.»Хардыы» айар түмсүү.

📝»Төрүт тылы үйэтитээччи» анал аат ананна Заровняева Анфиса Архиповна, Горнай улууһа, Кэптин сэл.
📝 «Ийэ тыл ырыаһыта» анал аат ананна Гуляева Антонина Семеновна, Сунтаар улууһа, Сунтаар сэл.СПТЛИ. педагог-библиотекарь.
📝»Удьуор тыл ойууһута» анал аат ананна Лугинов Борис Степанович — Борис Борогонскай.Уус Алдан улууһа, Бороҕон сэл.

📌 *Аҕам саастаахтар* (50 саастан үөһээ):
🔸Сысолятина-Слепцова Татьяна Егоровна. Кыайыылаах үрдүк аатын ылла.Таатта улууһа, Ытык-Күөл сэл.»Удьурхай» бөлөх.
🔸Борисова Любовь Ивановна — Кустук Хотун — 2 миэстэ. Кэбээйи улууһа, Чагда сэл.
🔸Винокурова Ольга Владимировна — Саймаара — 3 миэстэ.Бүлүү улууһа, Чочу нэһилиэгэ.

📝»Тыл алыбар ылларбыт» анал аат ананна Попова Марина Спартаковна — Дьөһөгөй Кыыһа.Таатта улууһа, Дьохсоҕон. «Куорсун» айар түмсүү.

Бары кыайыылаахтарга итии-истиҥ эҕэрдэ!
Кыттыыны ылбыттарга улахан махтал!
Айар-суруйар аартыккыт арыллан истин, истиҥ-иһирэх хоһоонноргутунан ааҕааччыларгытын үөрдэ туруҥ!

Дьүүллүүр сүбэҕэ үлэлээтилэр:
1.Самсонова Светлана Николаевна — Сиибиктэ, Кэбээйи улууһун Танара орто оскуолатын саха тылыгар уонна литературатыгар учуутала, СӨ Үөрэҕириитин туйгуна, АФ Үөрэҕириитин бочуоттаах үлэһитэ, суруналыыс, «Лена долгуннара» айар түмсүү чилиэнэ.
2.Колмогорова Акулина Павловна, Дьокуускай куорат. «Куорсун» айар түмсүү, СӨ Үөрэҕириитин туйгуна, саха тылын, литературатын үрдүк категориялаах ветеран учуутала.
3.Филатова Елена Афанасьевна — Сыгыйык, СӨ суруйааччыларын сойууһун чилиэнэ, СӨ култууратын туйгуна, Таатта улууһун «Уран тыл» уонна Чөркөөх сэлиэнньэтин «Иэйии түһүлгэтэ» айар түмсүүлэрин чилиэнэ.

18.02.2023 сыл.

 

Кыайыылаахтар хоһооннорун сэҥээрэн ааҕыҥ:

 

Сахам тыла.

Сайдыылаах сүүрбэ биирис үйэҕэ
Сахам тыла сайдарын, самнарын
Саныыбын куруутун туоххаһыйа
Сүрэхпэр күүскэ ылынан.

Өксөкүлээхтэн төрүттэнэн,
Алампаттан айхаллатан,
Ойуунускайтан оҥоһуллан
Тиийэн кэлбит сахам тыла.

Икки үйэни нөҥүөлээн
Ииччэх-бааччах үүнэн-сайдан,
Түһүү-тахсыы үктэллэнэн
Тиийэн кэлбит сахам тыла.

Мин тылым сайдыа диэн эрэнэбин
Кэскиллэниэ диэн кэтэһэбин,
Саргыланыа диэн айхаллыыбын
Сахалыы саҥа сатараатын!

Жанна Павлова.
9 кыл.үөрэнээччитэ.
Сунтаар улууһа. П.Х.Староватов аатынан Элгээйи орто оскуолата.

 

Сахам тыла!

Ийэм үүтүнүү сүрэхпэр-быарбар киирэр!
Сахам тыла!
Ийэм туттарыныы-хаптарыныы ураты истиҥ!
Сахам тыла!
Ийэм саламаатыныы ураты минньигэс!
Сахам тыла!
Ийэм ырыатыныы ураты уйаҕас!
Сахам тыла!
Ийэм алгыһыныы ураты айылгылаах!
Сахам тыла!
Ийэм итэҕэлинии ураты күүстээх!
Сахам тыла ойуу-дьарҕаа симэҕэ, ийэм кута-сүрэ, итэҕэлэ!
Саха күүһэ!
Саха күүстээх – айылҕатынан,
Илдьэ кэлбит итэҕэлинэн!
Саха күүстээх – үс кутунан,
Таайыллыбат айылгытынан!
Саха күүстээх – санаатынан,
Тылын ойуулаах саҥатынан!
Саха күүстээх – олоҥхотунан,
Талыы тылы сааһылыырынан!
Саха күүстээх – ырыатынан,
Тохтор тойугун кылыһаҕынан!
Саха күүстээх – силиһинэн,
Тулхадыйбат тутулунан!
Саха күүстээх – сиэринэн,
Тыа сиригэр олорорунан!
Саха күүстээх – бэйэтинэн,
Тымыр-сыдьаан удьуорунан!
Саха күүстээх – төрдүнэн,
Төрүт түүр хааннааҕынан!
Саха күүстээх – сахатынан!

Попова Вероника -Туналы Солко.
Кыйы. «Хардыы» айар түмсүү.

 

Төрүт тыл.

Сахам тыла силлибэт силистээххин,
Улаҕалаах урукку үйэлэртэн,
Уҥуора көстүбэт кэмнэртэн,
Уһаарыллан уһун тыыннааххын.

Сахам тыла куйаар курдук киэҥҥин,
Түгэҕэ көстүбэт дириҥ далайгын,
Кыһыл саһыл кылааннааххын,
Кыыһар сарыал кырааскалааххын.

Олохпут оҥкулун ойуулуур
Оһуор-дьарҕаа мандардааххын,
Иэйии утаҕын ханнарар
Сөрүүн сүөгэй амтаннааххын.

Таптал кутаатын күөдьүтэр
Алыптаах көстүбэт утахтааххын,
Айар тыл абылаҥын куустарар
Айар-тутар сүүс албастааххын.

Сиэри-туому ситэрэн торумнуур,
Үтүөнү-кэрэни кэрэһэлиир,
Алаадьы,саламаат сыттаах
Арчылыыр алгыс тыыннааххын!

Үрдүк чыпчаалы дабатар
Өргөс сытыы кынаттааххын,
Сомоҕолуур түмэр күүстээх
Өркөн төлөн кыымнааххын.

Төрөөбүт сахабыт тыла
Өлбөөдүйбэтин, өспөтүн!
Төрүт тылбытын-өспүтүн
Өлбөт уһун үйэлиэҕиҥ!

Татьяна Сысолятина — Слепцова.
«Удьурхай» түмсүү.

 

Айар күрэскэ кыттыбыттарга махтал!

Айар -суруйар үлэҕитигэр ситиһиилэри, кытаанах доруобуйаны баҕарабыт!

Добавить комментарий

Ваш адрес email не будет опубликован. Обязательные поля помечены *