Сахалартан бастакынан Фрунзе аатынан Байыаннай академияны бүтэрбит, Хасан күөллээҕи кыргыһыыга бастакы бойобуой сүрэхтэниини ааспыт, Аҕа дойду Улуу сэриитигэр Ленинградтааҕы фронт разведкаҕа отделыгар сулууспалаабыт, Прибалтикаҕа уонна Бенилюкс дойдуларыгар антифашистыы утарсыы кыттыылааҕа, Аан дойду иккис сэриитин кэннинээҕи Европаны үллэстии туоһута, ньиэмэс концлааҕырдарын уонна ГУЛАГ эрэйин эҥэринэн тэлбит, номоххо киирбит разведчик, Кыһыл армия старшай лейтенана Георгий Михайлович Андросов (Джорж Андерсен)олунньу ыйа 23 күнүгэр төрөөбүтэ 110 сыла буолбута.

Төрөөбүт дойдутун көмүскүүргэ ананан төрөөбүт саха саарына Аҕа дойдуну көмүскээччилэр күннэригэр күн сирин көрбүтэ олус символичнай. Байыаннай уонна разведчик үөрэҕин сэргэ Георгий Михайлович ньиэмэс, англия, француз уонна дьоппуон (чопчута суох да буоллар) тылларын баһылаабыт, худуоһунньук, каллиграфист, чаһы оҥорооччу, экономист, электрик идэлэрин баһылаабыт дэгиттэр киһи этэ.
Киэҥ сирдэринэн ыырдаммыт, ураты дьылҕалаах киһи киэнэ аҕыс кырыылааҕа Георгий Андросов албан аатыгар сүгүрүйэн, сахалар кининэн киэн туттуохтаахпыт.
Кыра үрүйэттэн улуу өрүс үөскүүрүнүү кыра түөлбэ биирдиилээн дьонун дьылҕатыттан бүтүн аарыма дойду историята таҥыллар.

Разведчик Георгий Андросов туһунан кинигэни библиотекаттан уларсан ааҕыҥ!Оҕолоргутугар киэн туттар биир дойдулаахпыт,Тааттаттан төрүттээх герой разведчик туһунан кэпсээҥ,билиһиннэриҥ.