1 Star2 Stars3 Stars4 Stars5 Stars (3 оценок, среднее: 5,00 out of 5)
Загрузка...
514 просмотров

Дьохсоҕоҥҥо-үҥкүү кэрэ киэһэтэ.

Муус устар 29 күнэ –Аан дойдуга Үҥкүү күнэ.

Бу бэлиэ күҥҥэ Дьохсоҕон нэһилиэгэр үҥкүү кэрэ кэнсиэрэ буолан ааста.Детсад оҕолоруттан саҕалаан нэһилиэк тэрилтэлэрин үҥкүүһүттэрэ, үҥкүү бөлөхтөрө уонна «Саһарҕа» үҥкүүһүт эбээлэр түмсүүлэрин толорууларыгар араас омук үҥкүүлэринэн көрөөччүлэри үөртүлэр.Үҥкүүлэри хаартыскаларга көрүөххүн сөп.

Үҥкүү аан дойдутааҕы күнүнэн Саха норуотун искусствотын биир кэрэ көрүҥэр — үҥкүү эйгэтигэр Тааттабытын ааттаппыт, ааттатар үҥкүүһүттэр тустарынан кинигэни билиһиннэрэр «Биир кинигэ выставкатын» сэҥээриҥ.

Саха искусствотын сайдыытыгар баараҕай баҕана буолбут чулуу дьоммут кэккэтигэр биһиги биир дойдулаахпыт, саха балетын бастакы үҥкүүһүтэ, педагог, балетмейстер Иннокентий Дмитриевич Христофоров аата көмүс буукубанан суруллар.Кини 1919с. сэтинньи 12 күнүгэр, Байаҕантай улууһун киинин Баайаҕа Арахсыылаах нэһилиэгэр, билиҥҥинэн Саҥа Олоххо, Дмитрий Ефимович уонна Матрена Егоровна Христофоровтарга уол оҕо төрөөбүтэ. Уоллара Лэгэнтэйэп таҥара чугаһыгар төрөөбүтүн иһин төрөппүттэрэ Иннокентий диэн сүрэхтээбиттэрэ. Саах сыбахтаах, көмүлүөк оһохтоох саха балаҕаныгар күөх окко төкүнүс гыммыт кыһыл оҕо, кэлин улаатан, норуотугар Балет Искусствотын суолун тэлээччи буолуохтааҕа.
Иннокентий Дмитриевич Христофоров “Сахалартан бастакы балет солиһа, педагог, балетмейстер” диэн суруллан Тааттаттан тахсыбыт чулуу дьон олохторун сырдатар “Аартыгы арыйааччылар” диэн биобиблиографическай ыйынньыкка Өксөкүлээх, Алампа, Ойуунускай ааттарын сэргэ киирбитэ.Манна өссө ааҕыҥ «Дружба» оҕо үҥкүү ансамблын тэрийээччитэ А.Ф.Клакинова уонна саха искусствотыгар эстраднай үҥкүүнү киллэрбит А.Д.Афанасьев тустарынан.
Ыйынньыгы Таатта киин библиотекатын үлэһиттэрэ бэлэмнээн 2012 сыллаахха “Таатта” редакциятыгар таһаартарбыттара.

“У колыбели якутской Терпсихоры стоит немало славных имён. И в начале начал – трепетное имя для каждого из нас, кто вверил ей свою судьбу. Иннокентий Дмитриевич Христофоров.
Он в числе первых из народа саха – солист балета и педагог классического танца 40-х, первый из саха балетмейстер-хореограф и руководитель балетной труппы 50-х. Когда-то это имя звучало для современников символом только родившегося юного якутского балета, впервые представшего перед взорами якутян…”
Саха Республикатын искусствотын үтүөлээх деятелэ Л.В.Габышева.

Искусство кэрэ эйгэтигэр аҕатын туйаҕын хатарбыт
,саха оҕотун талаанын алмаас таастыы күлүмүрдэтэ, чаҕылыта оонньоппут, “Ньургуһун” оҕо-үҥкүү образцовай ансаамбылын тэрийэн үрдүккэ көтүппүт, аар саарга аатырдыбыт Саха Республикатын культуратын үтүөлээх үлэһитэ Людмила Гаврильевна Неустроева Искусство Кэрэ эйгэтигэр айан-тутан ааспыт олоҕо, культура сайдыытыгар киллэрбит кылаата “Аҕа уонна кыыс” кинигэҕэ толору сырдатыллар.

«Гаврил Андреевич, Варвара Тимофеевна Неустроевтарга Людмила дьиэ кэргэн бастакы оҕото, дьонун ийэ, аҕа дэппит маанылаах кыыстара буолар. Аҕа сылаас тыынынан угуттанан, ийэ истиҥ тапталынан биэбэйдэнэн улааппыт Людмилаҕа кэрэ эйгэтин киэҥ аартыгар, ыыра кэҥииригэр далаһа уурбут эбит ээ, аҕата барахсан! Людмила Гаврильевна дьоҕура, талаана оҕо сааһыттан силис тардан, бу кэрэ кэми кытта ситимнэнэн, тэҥҥэ иитиллэн, сайдан, тоҥтон толлубат ньургуһун буолан, сүрэҕин сылааһынан угуттаан, дууһатын нөҥүө аһаран, «Ньургуһун» үҥкүү ансаамбылын тэрийбитэ. Ньургуһун… Тоҥ буору тобулан, харалдьыкка үүммүт, дьулурҕатык, эрчимнээхтик күн диэки тардыспыт кэрэ сибэкки аатынан ансаамбыл- Людмили Гаврильевна айар үлэтин чыпчаала»,- диэн кинигэ аан тылыгар суруллубут.

Бу саҥа кинигэни уларсан аахтаххына айылҕаттан айдарыылаах, талааннаах чулуу дьоннор үҥкүү алыптаах эйгэтигэр тугунан да кэмнэммэт сүдү кылааты киллэрбиттэрин билиэҥ!

Добавить комментарий

Ваш адрес email не будет опубликован. Обязательные поля помечены *