🚩130🚩130🚩130🚩130🚩130
Бүгүн Ыам ыйын 4 күнүгэр күнүс 15.00 чаастан Дьохсоҕон нэһилиэгэр Алампа аатынан Норуот айымньытын дьиэтигэр саҥа интэриэһинэй күрэхтэһии буолан ааста.
3 ыаллыы олорор нэһилиэктэр Дьохсоҕон,Чөркөөх,Кыйы оскуолаларыттан 9 үөрэнээччи Бастакы кустовой
Интеллектуальнай оонньууга күрэхтэстилэр. Бу саҥа солун күрэхтэһиини тэрийэн ыыттылар Алампа аатынан норуот айымньытын дьиэтин үлэһиттэрэ (директор И.С.Жараева,худрук А.В.Константинова,оператор Н.А.Максимова) уонна М.А.Петров аатынан нэһилиэк библиотеката (библиотекарь Г.Н.Другина,тех.үлэһит М.Г.Дорбохова). Күрэхтэһиибит киэҥ биһирэбили ылбыт, үрдүк интэриэһи тардар Киин ТВ «Поле чудес» оонньуутун быраабылатынан ыытылынна. «Кэриэһим кэннибэр хааларым кэхтибэт кэрэкэ тылларым…» диэн ааттаах П.А.Ойуунускай төрөөбүтэ 130с. кини 4 биллэр айымньыларын төһө билэргэ тургутан көрүү буолла.

📍1раунд «Син биир буолбаат» хоһоон анаммыт киһитин билиигэ кыайыылаах Дина Барашкова Чөркөөх орто оскуолатын 7 кылааһын үөрэнээччитэ.
📚 2 раунд ыйытыга Улуу Кудаҥса айымньыттан. Манна кыайыылааҕынан буолла Лилия Чехченнонова Тыараһа орто оскуолатын 7 кылааһын үөрэнээччитэ.Бу раунд оонньуутун ыытта Чөркөөх модельнай библиотекатын библиотекара А.П.Билюкина.
📚 3 раунд ыйытыга «Өрүөл кэриэһэ» хоһооҥҥо кыргыһыы буолбут сирин таайан кыайыылаах
Егор Окоемов Тыараһа орто оскуолатын 8 кылааһын үөрэнээччитэ буолла.Бу раунд оонньуутун ыытта Кыйы нэһилиэгин библиотекара М.Д.Слепцова. Интеллектуальнай күрэхтэһии бастакы күрэһин,финалистарга уонна Супер оонньууну ыытта Дьохсоҕон нэһилиэгин библиотекара Г.Н.Другина.

📍Онтон кыайыылаах 3 финалистарга «Ийэм Дьэбдьэкиэй уҥуоҕар» хоһоонтон автор төрөөбүт алааһын хоһуйбут тылларын бастакынан биллэ Егор Окоемов. Онон супер оонньууга Егор киирдэ.
📍 П.А.Ойуунускай «Өрүөл кэриэһэ», «Син биир буолбаат» уонна «Ийэм Дьэбдьэкиэй уҥуоҕар» айымньыларыттан тыллары таайыыга турунна. Манна ыйытыктарга эппиэттэри барытын толкуйдаан, билэн Егор Окоемов Тыараһа орто оскуолатын 8кылааһын үөрэнээччитэ Кыайыылаах үрдүк аатын ылла.
📍Бүгүҥҥү күрэхтэһиигэ кэлэн кыттыыны ылбыт үөрэнээччилэргэ, кинилэр салайааччыларыгар: саха тылын уонна литературатын учууталларыгар Е.С.Даниловаҕа, М.В.Сивцеваҕа уонна психолог-педагогка С.Д.Новгородоваҕа махталбытын тиэрдэбит. Маннык интэриэһинэй, үөрэнээччи аахпытын өйдөөн кэлэн сөптөөх эппиэттэри биэрэригэр толкуйдатар күрэхтэһиилэр өссө да салҕанан ыытылла турдунар.
📍Кыайыылаах Егор Окоемовка улуу убайбыт П.А.Ойуунускай мөссүөннээх өйдөбүнньүк бэлэх, Добун сурук туттарылынна. Кыттыбыт оҕолор туоһу суруктары уонна өйдөбүнньүк бэлэхтэри тутаннар бары уопсай хаартыскаҕа түстүлэр. Кинигэ быыстапкатыгар П.А.Ойуунускай кэпсээннэринэн М.А.Петров аатынан библиотека ааҕааччылара оҥорбут кинигэлэрин сэҥээрэн көрдүлэр.Көрөөччүлэргэ сынньалаҥ кэмигэр ыытыллыбыт П.А.Ойуунускай айымньыларыгар викторинаҕа кыайыылаах Чөркөөх оскуолатын 7кылааһын үөрэнээччитэ Айтал Гуляев буолла уонна кинигэнэн бэлиэтэннэ. Онтон оонньуу устатыгар саамай элбэх,о.э. 41 очкону ылбыт Лилия Чехченнонова кинигэ бэлэх тутта. Киирии билиэккэ көрөөччү оҕолор Пушкинскай картанан туһаннылар. Бүгүн бастакы кустовой интеллектуальнай Күөн күрэс көхтөөхтүк ааста. Бу уһун сыллаах программа  «Время читать 4Б» диэн ааттаах. 2018с.түөрт нэһилиэк библиотекалара сүбэлэһэн тэрийбиппит,Киин библиотека гл.методиһа У.И.Заболоцкая идеятынан.Бу программа үс интэриэһинэй бырайыактарынан холбоһуктаах үлэлэр ыытылыннылар. Бастакы бырайыакпыт «Сааскы таммахтар» диэн ааттаах улуус айар түмсүүлэрин уонна нэһилиэк библиотекаларын ыҥыраммыт сэргэх тэрээһин Дьохсоҕоҥҥо саҥа кулуупка ааспыта.Иккис тэрээһин ковид кэмигэр Алампа аатынан норуот айымньытын дьиэтин уонна нэһилиэк библиотекатын идеяларынан  түөрт нэһилиэккэ онлайн күрэхтэһии ыыппыппыт.Бу ыытыллыбыт тэрээһиҥҥэ Даайа Амма нэһилиэгиттэн суол алдьанан оҕолор кыттыыны ылбатылар.Быйылгы П.А.Ойуунускай үөрүүлээх үбүлүөйүгэр ананан ыытыллыбыт тэрээһиҥҥэ кыттыбыттарга барыгытыгар махтал. Инникитин да ааҕааччыны кытта үлэҕэ сэргэх бырайыактар ситиһиилээхтик  ыытылла турдунар.