1 Star2 Stars3 Stars4 Stars5 Stars (13 оценок, среднее: 4,62 out of 5)
Загрузка...
186 просмотров

Үүт үрүмэни оҥорууга үөрэниҥ.

🌿🥣🌿🥣🌿🥣🌿🥣🌿🥣🌿🥣
*Саха төрүт аһын — киэҥ эйгэҕэ* диэн бырайыагынан, Аан дойдутааҕы дьиэ-кэргэн күнүнэн Дьохсоҕон нэһилиэгин кэрэ аҥардарыгар, күн күбэй ийэлэригэр, далбар хотуттарыгар бүгүн ыам ыйын 17 күнүгэр Алампа аатынан норуот айымньытын дьиэтигэр олус интэриэһинэй тэрээһин буолан ааста.
Маастар кылаас кыттыылаахтарыгар уонна ыҥырыылаах ыалдьыттарбытыгар анаан алаадьы астыы көрүстүбүт. Күндү ыалдьыппытын
Потребкооперация туйгунун, СР бочуоттаах бэтэрээнин, Таатта нэһилиэгин бочуоттаах олохтооҕун Мария Егоровна Бондареваны арыаллаан илдьэ кэллилэр коллегаларбыт «Сарыал» КК М.Г.Сунхалырова, А.Е. Бондарева.
Мария Егоровна самаан сайын күүтүүлээх күндү ыһыаҕын көрсө өбүгэ маанылаах астарын арыылаах саламааты уонна үүт
үрүмэни оҥорууга маастар кылаас ыытта.
Быйыл Таатта улууһугар улуу убайбыт П.А.Ойуунускай төрөөбүтэ 130 сылын көрсө «Иис.Уус.Ас» өрөспүүбүлүкэтээҕи фестиваль буоларын бары билэҕит.Бу фестивалы көрсө улуус киинигэр, нэһилиэктэргэ маннык олус туһалаах, наадалаах маастар кылаастары бэйэлэрин идэлэрин толору баһылаабыт киэн туттар биир дойдулаахтарбыт ыытан саҕалаабыттара. Мария Егоровна сатабыллаах маастар повар, Тарбахов И.И. курдук төрүт аспытын тарҕатааччылартан биир тарбахха баттанар асчыппыт буоларын билэбит. Дьэ ийэлэр, эбэлэр үөрэ-көтө саламаат буһарыы уонна үүттэн үрүмэтин арааран ылыы кистэлэҥнэригэр үөрэннилэр. Бэйэлэрэ маастар үөрэппитинэн боруобаланан үрүмэни ороотулар,үүтүн сүүрдэн арыылаатылар. Мария Егоровна элбэх өйдөммөт ыйытыктарга сүбэ-ама биэрдэ,ис сүрэҕиттэн кыһаллан сатабылын үллэһиннэ. Түмүгэр сылаас алаадьылаах, арыылаах саламааттаах уонна саха сандалытын сэдэх, күндү аһа — үүт үрүмэтин амсайан итии чэйдээх төрөөбүт төрүт астарбыт туһунан истиҥ сэһэргэһии буолла.
Бу күн тиэмэтигэр сөп түбэһиннэрэн «Сандалыбыт сахалыы астара» диэн кинигэ быыстапкатыгар И.И.Тарбахов кинигэтиттэн саҕалаан өбүгэлэрбит ый эргииринэн күндү астарын ырысыаптара, сыма өбүгэ төрүт аһа уо.д.а. тустарынан сэдэх кинигэ, саха куукунатын туттар тэриллэрин көрдөрөр уо.д.а. туһалаах, наадалаах кинигэлэр бааллар. Ону таһынан таарыччы, билигин кэтэх хаһаайыстыбаҕа эт-ас оҥосторго түргэнник ситэр кустары-хаастары иитэргэ, билигин саамай туһалаах кинигэлэри көрдүлэр. Бу үүт үрүмэни үүттээх эрэ буоллаххына оҥороҕун, ынахтаах буоллаххына эрэ үүттэнэҕин. Сэдэх саха ынаҕын туһунан альбом кинигэни көрдүлэр. Ийэлэр кинигэлэртэн наадалаах ырысыаптары ыллылар.
Алампа аатынан норуот айымньытын дьиэтин директора И.С.Жараева, олохтоох библиотекарь Г. Н. Другина Махтал сурук уонна Мандарга анаммыт хоһооннор хомуурунньуктарын бэлэх ууннулар.
Бэтэрээн учуутал С.К.Архипова махтал тылларын кытта Мария Егоровнаҕа сэмэй бэлэҕин туттарда.
Дьиэ хаһаайкалара өссө биир сатабылы иҥэринэн, үөрэн-көтөн, сүргэлэрэ көтөҕүллэн, күн сарсыҥҥыттан дьиэлэригэр үрүмэ боруобалаан көрөргө сананан тарҕастылар. Коллегаларбытыгар М.Г.Сунхалыроваҕа, А.С.Бондареваҕа махталбытын тиэрдэбит, бу курдук улуус нэһилиэктэрин культуратын үлэһиттэрэ бэйэ-бэйэни өйөһөн хардарыта уопут атастаһарбыт биир көрүҥэ буоллаҕа.
Күндү ийэлэр, эбэлэр!
Мария Егоровна Бондарева ыытар сахалыы астарбытын тарҕатар, элбэҕи үөрэтэр маастар кылааһыгар сылдьыҥ, туһаныҥ!

Добавить комментарий

Ваш адрес email не будет опубликован. Обязательные поля помечены *