Тохсунньу 27 күнүгэр 1944 сыллаахха Ленинград куорат фашист блокадатыттан босхоломмут күнэ. Блокада 1941 сыл балаҕан ыйын 8 күнүттэн саҕалаан барыта 872 түүннээх күн салҕаммыта.
Сэрии саҕаланыыта Ленинградка 3,2 мөлүйүөн киһи олороро. 333 бөдөҥ промышленнай тэрилтэ, элбэх фабрика, завод, 130 научнай-чинчийэр институт, 60 үрдүк үөрэх кыһата, 106 техникум баара. Онон Ленинград дойду научнай, экономическай, промышленнай киинэ этэ.
Ол да иһин Гитлер бастаан Ленинграды ылан баран, Москваны ылыам диэн суоттаммыта. Кини Ленинграды бастакы кыһыҥҥа блокаданан мөлтөтөн баран, сааһыары ылыам, сири кытары тэҥниэм, суох гыныам диирэ.

Блокада саҕаланарыгар куорат бородууктанан ситэ хааччыллыбатах этэ. Ладожскай күөлүнэн эрэ суол баара. Бу суолу фашистар артиллериянан ытыалыыллара, самолетунан буомбалыыллара. Онон аччыктааһын саҕаламмыта, дьиэлэри ититии, уунан хааччыйыы тохтообута. Олус уһун, тымныы кыһын буолбута.
Бастакы кыһыннарыгар хоргуйууттан, тоҥууттан сүүһүнэн тыһыынча киһи өлбүтэ. Блокада сылларыгар Ленинградка барыта 1- 1,5 мөлүйүөн киһи өлбүтэ диэн суруйаллар. Куоракка туох да ас , бородуукта кэлбэт буолбута. Күүстээх аччыктааһын саҕаламмыта.

Күннээҕи ас бэриллэр сиригэр уһун уочарат буолбута. Нуорма килиэп кыччаатар кыччаан 125 грамҥа тиийэ түспүтэ.

Төгүрүтүллүбүт куорат иһигэр уу саппааһа суох буолбута. Ууну бэрт эрэйинэн Нева өрүстэн ылаллара, ол ыраах уонна үрдүк сиргэ баара, олус кутталлаах уонна сэрэхтээх этэ. Уу ыла баран баран аара тоҥон өлөөхтүүллэрэ, буомбалааһыҥҥа түбэһэллэрэ.

Аччыктааһыны эбии олус тымныы күннэр турбуттара. Ититэр систиэмэ буомбалааһыҥҥа алдьанан дьиэлэр хам тоҥмуттара, буржуйка дэнэр оһохтору оттон сылытыналлара, оттук мас да бараммыта, дьон туох баар харыстыыр малларын-кинигэлэрин, кумааҕыларын барытын оттукка туттубуттара

Төһө да хам аччык, тоҥон илибирэһэ сырытталар оҕолор оскуолаҕа үөрэхтэрин тохтоппотохторо. Төһө да ыарахан усулуобуйаҕа олордоллор кырачаан оҕолор собуоттарга үлэлээн сэриигэ көмөлөһөллөрө.

Таня Савичева дневнигин туһунан билбэт, кини туһунан аахпатах киһи суоҕа буолуо. Кырачаан Таня чугас дьонун барыларын сүтэрбитэ. Кини дневнигэр ол туһунан бэлиэтэнэн испитэ билигин мусуойга хараллан сытар.

Норуот күүстээх санаатынан, дьулуурунан, дойдуга тапталынан тапталлаах Ленинград куоратын өстөөхтөргө туран биэрбэтэҕэ.
1944 сыл тохсунньу 27 күнүгэр Ленинград куораты блокадаттан босхолообуттара, куоракка салют ыппыттара.

1965 сыл ыам ыйын 8 күнүгэр Ленинградка дьоруой-куорат аата иҥэриллибитэ.