1 Star2 Stars3 Stars4 Stars5 Stars (6 оценок, среднее: 5,00 out of 5)
Загрузка...
128 просмотров

Төрүт тылбыт күнүгэр «Өркөн өй»

М.А.Петров аатынан нэһилиэк библиотекатыгар
«Төрөөбүт тыл уонна сурук-бичик күнүгэр» аналлаах «Өркөн өй» диэн солун тэрээһин буолла. Саха литературатын, суруйааччылар айымньыларын үөрэтэн билэр-көрөр үөрэнээччилэр уонна библиотека аҕа көлүөнэ ааҕааччылара өй-билии тургутуһар араас сорудахтардаах сытыы көрсүһүүлэрэ буолан ааста. Үс хамаанда «Саһарҕа», «Чолбон», «Ситим» сахалыы билиилэринэн күрэхтэстилэр.
Бастакы хамаанда — үҥкүүһүт эбээлэр, библиотека бастыҥ ааҕааччылара Л.К.Власова, О.П.Яковлева, А.Л.Софронова. Кинилэр сылын аайы ыытыллар төрөөбүт төрүт тыл күнүн тэрээһиннэрин, сахалыы уонна олоҥхо дьыктааннарын көхтөөх кыттааччылара. Октябрина Петровна кыыһа Саргылана Егоровна, сиэнэ Мичийэ буоланнар 2018с. Национальнай библиотека тэрийбит Бастакы өрөспүүбүлүкэтээҕи «Дьиэ кэргэнинэн ааҕааччылар» конкурстарыгар кыттаннар бастакы миэстэни ылары ситиһэн олус үөрдүбүттэрэ, нэһилиэктэрин аатын ааттаппыт биир саамай көхтөөх дьиэ кэргэн. Эбээлэрэ Октябрина Петровна ыытыллар дьыктааннарга көтүппэккэ кыттан 4 төгүл «Бастыҥтан бастыҥ суруксут» диэн үрдүк аатынан бэлиэтэммитэ. Кини сиэннэрин кинигэни таптаан ааҕарга үөрэтэр — холобур буолар Эбээ. Любовь Константиновна оҕолору айылҕаҕа чугаһатар, өбүгэ сиэрин-туомун тутуһарга үөрэтэр, үөрэнээччилэри кинигэҕэ-ааҕыыга сыһыарар сыаллаах-соруктаах ураты бырайыагы толкуйдаан иккис сылын биир кылааска үлэлэтэ сылдьар айылҕа доҕоро. Ураты билиилээх-көрүүлээх, киэҥ интэриэстээх ааҕааччы. Онтон Анна Львовна агроном идэлээх буолан нэһилиэккэ бастакынан тиэргэҥҥэ араас оҕоруот астарын, үүнээйини, сибэккини олордууну саҕалаабыт баай опыттаах, үүнээйи чааһыгар холобурга сылдьар киэҥ билиилээх үлэһит буолар. Дьэ бу курдук талбыт курдук интэриэстээх, кинигэни ытыктыыр, ааҕыыны астынар эбээлэр үөрэ-көтө кэлэннэр кыттыыны ыллылар.
«Чолбон», «Ситим» хамаандалар оскуола 9 уонна 10 кылааһыттан талыллан кэлэн күрэхтэстилэр. Оскуола оҕолорун салайан аҕалла учууталлара Аида Анатольевна Саввина.
Күрэхтэһии ыйытыктара түөрт талар эппиэттээхтэр. Тобуллаҕастык толкуйдаан, түргэнник эппиэттээн 27 сөптөөх эппиэти биэрэн «Саһарҕа» хамаанда бастаата.
Иккис миэстэ «Ситим» хамаанда 17 эппиэттээх. Үһүс миэстэ «Чолбон» хамаанда 10 сөптөөх эппиэттээх. Бу курдук эбээлэр да, үөрэнээччилэр да тапталлаах сахабыт суруйааччыларын, кинилэр айымньыларын ааттарын уонна дьоруойдарын өйдөрүгэр — санааларыгар иҥэринэ сылдьалларын көрдөрдүлэр.Күрэхтэһииттэн сүргэлэрэ көтөҕүлүннэ, билиилэрин чиҥэттилэр, умнубуттарын өйдөөтүлэр, олус астыннылар.Түмүккэ хамаандалар саха омук бэлиэ күнүн өйдөтөр суруктаах мэтээллэри кэтэн умнуллубат өйдөбүлгэ анаан хаартыскаҕа түстүлэр.Оҕолор маладьыастар! Төрөөбүт литератураны билиилэринэн эбээлэри үөртүлэр. Түгэнинэн туһанан учууталларыгар саха литературатын, тылын үөрэтэр Мария Владимировна Сивцеваҕа махталбытын тиэрдэбит, төрөөбүт тылбытынан суруйааччылары уонна кинилэр биллэр-көстөр айымньыларын киэҥник билиигэ үөрэнээччилэрин сирдииригэр. Өссө да инникитин маннык үтүө күрэстэр ыытылла туралларыгар баҕа санааларын этэн күрэхтэһээччилэр махтанан тарҕастылар.

Добавить комментарий

Ваш адрес email не будет опубликован. Обязательные поля помечены *