1 Star2 Stars3 Stars4 Stars5 Stars (4 оценок, среднее: 5,00 out of 5)
Загрузка...
124 просмотров

В родном наслеге А.К.Андреева-новая модульная котельная…

Киэн туттар биир дойдулаахпыт Ситэриилээх Киин Кэмитиэт уонна Совнарком бэрэссэдээтэлинэн, сахалартан бастакы коммунальнай хаһаайыстыба Наркомунан, Дьокуускай куоракка Киин электростанция дириэктэринэн үлэлээбит төрөөбүт дойдутун сайдыытын туһугар билиитин-көрүүтүн, чаҕылхай олоҕун анаабыт күндү киһибит Ананий Кононович Андреев төрөөбүт нэһилиэгэр
бүгүн кулун тутар 11күнүгэр Дьохсоҕоҥҥо Иван Игоревич Мохначевскай директордаах «Новаком» ХЭТ тутан бүтэрбит саҥа модульнай  котельнайа аһылынна. Котельнайы арыйыы үөрүүлээх чааһыгар кэллилэр: СӨ ОДьКХ уонна Энергетика Министра Вячеслав Павлович Емельянов, кылаабынай инженера Андрей Викторович Лебедев, Рахлеев П.Д. — Ил Түмэн депутата, кини көмөлөһөөччүтэ, ааспыт сылга диэри бэйэбит нэһилиэкпитигэр таһаарыылаахтык үлэлээбит ытыктабыллаах баһылыкпыт П.Е.Захаров, ОДьКХ Тааттатааҕы филиалын директора В.П.Будикин, Таатта улууһун аҕа Баһылыга А.С.Бурцев уонна нэһилиэкпитигэр саҥа быыбарданан талыллан үлэтин саҕалаабыт Баһылыкпыт В.А.Охотин.
Саҥа котельнай арыллыытыгар аал уоту аһатан алгыс эттэ СӨ култууратын үтүөлээх үлэһитэ, алгысчыт Попов А.Н. Элбэх эҕэрдэ этилиннэ, тутааччыларга махтал суруктар туттарылыннылар. Нэһилиэк үс түөлбэтигэр, ол иһигэр А.К.Андреев аатынан уулуссаҕа, теплотрасса тардыллан кэлэр кыһын ыаллары ититэргэ бэлэм буолла. Олохтоох нэһилиэнньэ аатыттан истиҥ махтал тыллары тутааччыларга, салайааччыларга тиэртэ бэтэрээн учуутал И.И.Потапов.
Тэрилтэ символическай күлүүһүн ЖКХ Боробуллааҕы учаастагын маастарыгар Н.И.Власовка туттардылар. Онон РФ Президенин талар быыбары көрсө нэһилиэнньэҕэ кэтэһиилээх котельнай үлэҕэ киирдэ. Саас, сайын теплотрасса тиийбит ыаллара дьиэлэригэр бэйэ күүһүнэн холбононнор, кырыалаах кыһыны оһох оттортон босхолонон, киин ситиминэн ититиллибит дьиэлэригэр сынньалаҥнык көрсүөхтэрэ диэн эрэнэбит.
Киин котельнай аһыллыыта — нэһилиэк историятыгар киирэр үөрүүлээх күн. Кэрэ бэлиэ кэмҥэ — быыбары көрсө нэһилиэкпитигэр сылааһынан хааччыйар улахан котельнай аһыллыбытыгар олохтоохтор үөрүүлэрэ улахан уонна бары бииргэ В.В.Путины кытта иннибит хоту сайдыыны талабыт, куоластыыбыт диэн бигэ санаалаахтар. Хаартыскалары көрүҥ, сэҥээриҥ, үрдүк үөрүүнү үллэстиҥ!

Добавить комментарий

Ваш адрес email не будет опубликован. Обязательные поля помечены *