Түптэ сыттаах,кус мииннээх, алаадьы астаах Ньукуолун күнүнэн нэһилиэкпит күндү бэтэрээннэрэ «Сырал тулааһына» балаҕаҥҥа нэһилиэкпит дьонун байанайдаах бултарыттан үөрэ көтө амсайан, кус миинин иһэн, арыылаах саламааттаах, алгыстаах алаадьылаах, сылабаарга чэй оргутарга күрэхтэһэн, итии үүттээх чэйдэрин иһэ-иһэ биэс бэлиэ күннэри барытын бииргэ 5в1 бырааһынньыктаан астына дуоһуйа сынньаннылар.
Сынньалаҥҥа лотолаан да ыллылар.
Пионерия  сылыгар аналлаах «Оҕо сааһым умнуллубат ырыалара» пионерскай ырыалар ылланнылар. «Биһиги кэммит киинэлэрэ», «Төрөөбүт төрүт тылбытынан аахпыт кинигэлэрбит» диэн Викториналарга көхтөөхтүк кыттан эдэр саастарын киинэлэрин ахтан санаан ыллылар. Сахалыы кинигэни аахпыт көлүөнэ буоланнар чаҕылхай билиилэриттэн үөрдүлэр. Бу күн бэтэрээннэрбит оҕо саастарын ахтан санаан аалай кыһыл хаалтыстарын, пилоткаларын илдьэ кэлэннэр өйдөбүнньүк хаартыскаҕа түстүлэр.
Нэһилиэкпитигэр өрөспүүбүлүкэ үтүөлээх оһуохай этээччилэрэ, анаан талбыт курдук, баар буоланнар тарбахтартан ылсыһан,тоҥолохтон тутуһан Таатталыы оһуохайга бары оһуохайдаан тэйэннэр самаан сайын кэлбитинэн айылҕаттан, оһуохай аптаах тылыттан-өһүттэн күүс-сэниэ ыллылар, олус астыннылар, сүргэлэрэ көтөҕүлүннэ,үөрүүлэрэ үрдээтэ.
Бу курдук үтүө үгэһинэн, сылын аайы ыытыллар сайыны көрсүү сиэрэ-туома толоруллан, силигэ ситэн ытыктабыллаах дьоммут санаалара кэлэн, кусчуттарбытыгар ис сүрэхтэн махтанан, эһиэхэйдээн эҥээритэн, ыллаан -туойан, саха төрүт астарын амсайан тарҕастылар.