Тааттаҕа Ананий Кононович Андреев төрөөбүт Дьохсоҕонугар сүгүрүйүү күнэ.

Балаҕан ыйын 25 күнүгэр Корякин А.И., СӨ Судаарыстыбаннай мунньаҕын тутууга, олорор дьиэ-уот хаһаайыстыбатын уонна энергетикаҕа бастайааннай кэмитиэтин бэрэссэдээтэлэ, В.С. Чикачев салайааччылаах олорор дьиэ-уот коммунальнай хаһаайыстыба салалтата, улуустардааҕы филиаллар дириэктэрдэрэ Саха АССР Ситэриилээх Киин кэмитиэтин уонна Совнарком бэрэссэдээтэлинэн, Дьокуускай куорат исполкомун бэрэссэдээтэлинэн, Дьокуускай куорат Киин электростанциятын дириэктэринэн, сахалартан бастакынан коммунальнай хаһаайыстыба наркомунан үлэлээбит, сахалартан бастакы үрдүк үөрэхтээх инженер-теплоэнергетик Ананий Кононович Андреев сырдык аатыгар сүгүрүйэ 13-с төгүлүн Таатта Дьохсоҕонугар анаан кэллилэр. Үөрүүлээх тэрээһиҥҥэ Таатта улууһун салалтата А.С.Бурцев, П.П. Максимов кыттыыны ыллылар.

Бу күн үлэ бастыҥнара чиэстэннилэр. Биһиги нэһилиэктэн  билигин бочуоттаах сынньалаҥҥа олорор ОДьКХ Боробуллааҕы учаастагын бэтэрээн салайааччыта, мэхээнньигэ,А.К.Андреев сырдык аатын бастакы үйэтитээччилэртэн  биирдэстэрэ ытыктабыллаах  Серафим Львович Попов уонна электрик Софронов Анатолий Георгиевич. Эдэр үлэһиттэр кочегардар Наумов Илья Яковлевич, Степанов Николай Гаврилович.

Дьохсоҕон оскуолатын выпускнига, транспортнай техникум үһүс кууруһун устудьуона Александр Матвеев Андреев Ананий Кононович аатынан стипендияны тутта.

Дьохсоҕоҥҥо саҥа үлэҕэ киирэр хочуолунайга Ананий Кононович Андреев аата иҥэрилиннэ.

Ыалдьыттарбыт «*Куонаан арыыта» бэлиэ сиргэ ытык киһибит монуменыгар уонна сайылыгар «Булгунньахтаахха» сылдьаннар тыыннаах сибэкки дьөрбөтүн уурдулар. Ананий Кононович Андреев аатынан «Сырал тулааһына» балаҕаҥҥа эбиэттээн төттөрү ыраах айаҥҥа, эһиил көрсүөххэ диэри туруннулар.
Ытыктабыллаах салайааччыларга, ыалдьыттарга биһиги күндү биир дойдулаахпытын Ананий Кононовиһы ытыктаан чиэстээн, сыл аайы кини төрөөбүт алааһыгар ыраахтан-чугастан кэлэннэр күндүтүк ахтан-санаан ааһалларыгар, ытыктабылларын биллэрэллэригэр уонна чуолаан А.К.Андреев аатынан  СӨ коммунальнай хаһаайыстыбатын музейын сэбиэдиссэйигэр күндү Галина Егоровна Арылаховаҕа улахан махталбытын тиэрдэбит! Киэн туттар биир дойдулаахпыт албан аатын үйэтитиигэ үлэҕэр үрдүк ситиһиилэри, салҕыы биллэ илик чахчылары көрдөөн булан норуокка тиэрдэргэр баҕарабыт!