Олоҥхо декадатын чэрчитинэн А.Н.Попов салайааччылаах  «Дьохсоҕон олоҥхоһуттара» түмсүү уонна М.А.Петров аатынан библиотека бүгүн «Мичил» ОСК ыалдьыттаатылар.

Оҕолорго аналлаах Олоҥхо кинигэлэрин, оҕолор олоҥхоттон уруһуйдарын көрөннөр кырачааннар сэҥээрдилэр. Саамай билэр олоҥхолорун, оҕолорго анаан кылгатыллан, кэпсээн көрүҥүнэн оҥоһуллубут «Дьулуруйар Ньургун Боотур» оҕолорго аналлаах кинигэтин көрөннөр, уруһуйдарынан сирдэтэн төһө билэллэринэн кэпсээтилэр.
Оҕолор олоҥхо кинигэлэрин ойууларын харахтарыгар хатаан, олоҥхо дьоруойдара куһаҕаны кыайалларын, бухатыырдар хорсуннарын, куттамматтарын, көмөлөһөр үтүө санаалаахтарын эттилэр.
Олоҥхо ис хоһоонун саамай өйдөөбүт, ыйытыктарга элбэхтик сөпкө эппиэттээбит Аделина Максимова уонна Арчылаан Петров оонньуур бириистэри туттулар.

Кинигэлэри билсиһии кэнниттэн оҕолор «Дьохсоҕон олоҥхоһуттара» толорууларыгар Үстүүн Нохсоороп «Сыанаканан сыһыылаах,холуопканан хонуулаах сындыыс Хара аттаах Дыырай Бэргэн» олоҥхотуттан быһа тардыыны иһиттилэр. Олоҥхо дьоруойдарын уобарастарын аҕыс олоҥхоһут арыйбыттарын оҕолор чуумпуран олорон иһиттилэр, «ноо» дэстилэр.

Олоҥхоһуттары истэннэр, олоҥхо дьоруойдара ойуулаах кинигэлэри көрөннөр кырачааннар «Олоҥхо алыптаах эйгэтигэр» ыалдьыттаатылар.