Тохсунньу 5 күнүгэр күнүс 2 чаастан Владимир Хрисанфович Тарбахов аатынан КСК «Сандаарда аптаах саҥа дьылбыт» оҕолорго утренник буолла. Онуоха халлааммыт туран биэрэн сылыйан оҕо тоҕуоруһа муһунна. Тымныы Мооруос, Хаарчаана, Саҥа Дьыл эҕэрдэ эриэккэһин тиэртилэр, кырачааннарга бадаарактарын туттардылар. Оҕолор ылбаҕай ырыаларын, хоһооннорун этэн минньигэс кэмпиэтинэн Тымныы Мооруостан күндүлэннилэр уонна «В лесу родилась елочка» хороводынан түмүктээн Тымныы Мооруостарын, Хаарчааналарын, саҥа дьылларын атаардылар.
Нэһилиэк устудьуоннара Вика Попова салайааччылаах Арсен Матвеев, Андрей Дорбохов, 9 кыл.үөрэнээччитэ Дьулус Малышев, 8 кыл. үөрэнээччитэ Симона Макарова «В поисках в волшебного амулета» инценировка көрдөрдүлэр. Нэһилиэк библиотеката саҥа дьыллааҕы литературнай таабырыннары, оонньуулары оонньотто.

«Саҥа сыл бэлиэтин» оҥоһуктарга кыайыылаах Виолетта Габышева саҥа дьылынан бириис тутта.

Оҕолор икки хамаандаҕа арахсан араас көрдөөх оонньууларга күрэхтэстилэр.
1 хамаанда капитана Юмшанов Айаал, 2 хамаанда капитана Попов Саша. Түмүгэр икки хамаанда тэҥнэһэн минньигэс бириистэри үллэстэн сиэтилэр.
Үөрүү — көтүү аргыстаах, сүргэни көтөҕөр Саҥа дьыл аптаах бырааһынньыгар оҕолор оонньоон, үөрэ-көтө күрэхтэһэн дьиэлэригэр тарҕастылар.

Айаал Юмшанов хамаандата.

Саша Попов хамаандата.

«Сыл бэлиэтэ» оҥоһуктарга кыайыылаах Виолетта Габышева

Литературнай саҥа дьыллааҕы викторина кыайыылааҕа Алгыстаана Наумова.