Олунньу 28 күнүгэр
Таатта улууһугар XIX төгүлүн ыытыллар Олоҥхо күнүн чэрчитинэн,
Улуу Кыайыы 80 сылынан тыыл, үлэ ветерана, Алдан нэһилиэгин Бочуоттаах гражданина, тойуксут, оһуохайдьыт, олоҥхоһут, алгысчыт, «СӨ норуот уус-уран айымньытын сайдыытыгар үтүөлэрин иһин» бэлиэ туһааннааҕа Михаил Иванович Иванов аатынан улуустааҕы
«КЫАЙЫЫ КЫНАТТААХ АЛГЫСТААХ ОҺУОХАЙ» түһүлгэтэ ыытылынна.
Түһүлгэ маанылаах ыалдьыттара Саха сирин Дархан этээччитэ, Саха сирин Дархан этээччилэрин сүбэлэрин бэрэссэдээтэлэ Валентин Хорунов – Дьэргэлгэн, Саха сирин Чулуу кыната, Саха сирин «Оһуохай» түмсүүтүн чилиэнэ Надежда Хорунова улахан күрэһи дьүүллээтилэр.
Финалга тута хоһуйууга 3 этээччи күөн көрсөн кииристилэр: Семенов Айтал Николаевич, Елена Егоровна Попова уонна
Любовь Константиновна Власова. Сахалыы сайаҕас тылынан Дьөһөгөй оҕотун туһунан олус баайдык толору хоһуйан КЫЛААН ЧЫПЧААЛ үрдүк аатын ылла Дьохсоҕонтон Любовь Константиновна. Ытык киһи М.И. Иванов оҕолоро туруорбут Улуу Кыайыы Чороонунан, сахалыы оһуордаах-мандардаах көбүөрүнэн, Өрөспүүбүлүкэтээҕи «Оһуохай» түмсүү туруорбут «Гиннес рекордун оһуохайа» хартыынатынан, Кылаан Чыпчаал кубогынан наҕараадаланна.
Кулун тутар ыйга Дьокуускайга Валентин Хорунов үбүлүөйдээх оһуохай күрэһигэр иккиэн ыҥырылыннылар. Кыайыылаахтар салайааччылара Афанасий Николаевич Попов. Сарыардаттан киэһээҥҥэ дылы«КЫНАТЧЫТТАРА» Мария Иннокентьевна Матвеева, Наталья Николаевна Попова.
Дьоһун Дьохсоҕоннор оһуохайга, олоҥхоҕо үрдүк ситиһиилэннилэр.
Түгэнинэн туһанан билиһиннэрдэххэ Любовь Константиновна уонна олоҥхоһут Владимир Петрович үһүс сылларын «Эбээ,эһээ үөрэҕэ» диэн өбүгэ үгэстэрин оҕолорго тиэрдэр сыаллаах бырайыактарын биир кылаас уолаттарыгар үөрэтэ сылдьар кэскиллээх үлэлээхтэр. Үөрэнээччилэрин бэйэлэрин холобурдарынан иитэллэр.