Төрөөбүт тыл,сурук бичик күнүгэр ананан нэһилиэккэ ыытыллыбыт декада түмүктүүр тэрээһинэ олус интэриэһинэй көрсүһүү буолла. Эбээ Валя Ытык Күөлгэ «Кэнчээри» оҕону сайыннарар киин ыҥырыытынан оҕолорго күндү ыалдьыт буолла. Кинилэргэ А.Егасова Дьохсоҕон Кыыһа «Дьүкээбил дьирбиитин иилиммит ала буркун аргыстаах Чысхаан тыал» олоҥхотуттан толорон иһитиннэрдэ. «Кырачаан истээччилэр олоҥхону сэҥээрэн чуумпуран иһиттилэр, бүппүтүм кэннэ оннооҕор оҕолор сыллаатылар» диэн күндү эбээ олус үөрэр, кини толоруута оҕолор өйдөрүгэр хатанан хааллаҕа. Норуот тылынан уус уран айымньытыттан оҕолорго иһитиннэрэн, төрөөбүт төрүт тылларыгар чугаһатан Ийэ олоҥхоһут биир умнуллубат кэрэ түгэни оҕолорго бэлэхтээтэ. Олоҥхоһуту истибиттэрин оҕолор хаһан да умнуохтара суоҕа. Онтон эбээ Валя толорор олоҥхолорун оҕо, ыччат истэннэр төрөөбүт тыллара олус баайын, кэрэтин уонна кэскиллээҕин өйдөөннөр тылларыгар болҕомтолоохтук сыһыаннаһыахтара, үөрэтэр, ааҕар баҕалара улаатыа уонна кэҥээн иһиэҕэ.Төрөөбүт тылы харыстаан кэнчээри ыччакка тиэрдии олохпут ирдэбилэ буоларын эбээ Валя өйдүүр уонна Ийэ тылбытын оҕолорго тиэрдиигэ түөн саҕа да туһалааҕы оҥордорбун диэн баҕа санаалаах маннык икки умнуллубат көрсүһүүлэри оҕолорго ыытта.

ТӨРӨӨБҮТ ТӨРҮТ ТЫЛЫМ

Төрөөбүт төрүт тылым
Күн сыдьаайыныы
Күлүмнүүгүн,
Дьүкээбил уотунуу
Дьиримниигин,
Кустук өҥүнүү
Күндээрэҕин,
Итии сайынныы

Илгийэҕин,
Сиккиэр тыаллыы
Сипсийэҕин,
Ийэ үүтүнүү
Өлбөт мэҥэҕин,
Аҕа алгыһыныы
Амараххын,
Оҕо сытыныы
Мип-минньигэскин,
Хомус тыаһыныы
Хомоҕойгун,
Эгэлгэ тылыҥ
Эридьиэһиин…
Истиҥиин-иһирэҕиин,
Имэҥнээҕиин…
Аһылаҥнааҕыын…
Эмиэ да сороҕор
Саҥарар тылын
Саталааҕын!
Илбистээҕин!
Иччилээҕин!…
Сүллэр этиҥнии
Сүллүгэстиигин!
Чаҕылҕанныы
Курбуулуугун!
Күүстээх силлиэлии
Кымньыылыыгын!
Чысхаан тымныылыы
Хаарыйаҕын!
Муҥургун биллэрбэт
Муҥутуур үрдүккүн!
Түгэххин булларбат
Дириҥ далайгын!…

В.Харайданова-эбэ Валя.
Дьохсоҕон.»Куорсун» айар түмсүү.

Таатта улууһа. 31.01.2022с.